Poko! Eske nouvo lame a bwè lwil?

Leyogan, jedi 31 out 2017 (nouvelpam.com).- Apre tout bri ki te fèt pou fè konprann lame dAyiti te pral rekanpe, gouvènman Tet Kale bis la sanble oblije teke fren li epi rale yon gwo bak sou pwojè sa.

Malgre yo te louvri san gad dèyè enskripsyon pou angaje 500 jenn Ayisyen ki ta pral tounen sòlda nan lame a, anyen pa janm fèt e menm rezilta enskripsyon ak egzamen yo pa jamn bay nan medya.

Ki sa ki pase menm pandan tan sa? Eske se presyon meriken ki fòse minis, premye minis ak prezidan rantre nan kal? Se sa nou ta ka konprann paske brit sou kou apre blan meriken ak kèk lòt peyi di yo pa enterese ak kò lame sa e se polis la ki enpòtan pou peyi a, gwo mesye lokal yo tou fèmen ni bouch ni aksyon.

Nan yon rankont minis defans Hervé Denis te genyen ak palmantè yo ki te krabinen li ak kesyon sou etamajò ki pa genyen ak ki objektif enskripsyon sa li te fè a, minis la te blije vire pawòl li lanvè pou di yo pa prese, paske enskripsyon ak egzamen yo te fè a pa vle di yo pral kouri chwazi 500 moun yo lamenm, men li di gen anpil wout pou ki fèt anvan tout bagay fèt.

Li menm rive di gen dyalòg ki pral tanmen ak sosyete a, yon bagay ki tout moun tap mande men gouvènman an te lonje bouch li byen long pou tchwipe.

Li tou anonse ke yo gen lide pou mete sou pye yon kòmandman pwovizwa pou nouvo lame sa. Yon bagay ki pa ekri okenn kote nan konstitisyon ak lwa peyi a.

 

Publicités

About Nouvel Pam

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *