Minis Bellevue : Yon ti pwason ki t ap swiv gwo kouran!

Eskandal kit eskolè : Eske se pa enjistis pouvwa a fè minis Afè Sosyal la?

Lendi 4 septanm 2017 (nouvelpam.com).- Yon minis pèdi chèlbè devan lasosyete, men dapre Senatè Kato, 3 lòt minis kontinye ap penpennen, byen mennen pandan non yo te site byen fò nan yon eskadanl, ke pèsonn poko ka konprann, sou zafè kit eskolè pou distribye bay elèv lekòl.

Minis Bellevue parèt tankou yon pitimi san gadò, yon kabrit san mèt ki lage aladriv pou vakabon pase anba kwen dan.. Ou ta di tou se tankou yon ti kòk san bèk ki kite lantouray mèt li pou al paweze nan savann kote nenpòt ti malfini k ap aprann vole file ak sa san mande rès.

Yon bon jou, pawòl sot nan palè nasyonal, vire nan tout granri, pase nan tout radyo : Plizyïè minis gen men foure byen fon nan yon zafè kit eskolè, kote lajan bay pa pil ak pakèt pou yon ti valiz plastik ki pa vo pip tabak.

Menm kote bri a soti, se menm kote a ki pran desizyon brit sou kou pou revoke ranplase youn nan minis dwèt lonje sou yo a. Podyab pòv minis Bellevue. Tout chay la tonbe sou do l.

Tankou se ti jenn minis la ki mèt biznis zanmi gwo towo yo, tankou se li ki te fè dosye mache rapid pou chèk soti al jwenn envestisè kanpay elektoral, tankou se li sèl non te site nan eskandal ki sanble kou 2 gout dlo ak move montaj, tankou li pa gen okenn « prezonpsyon inosans », tankou li pa ta dwe gen posiblite pou bay demisyon l pou sove lonè.

Sak pi rèd la, lè palmantè poze Premye Minis kesyon deki prevyen revokasyon san ankèt. Premye Minis reponn se sou baz pawòl ki te pale nan lari,  rimè ki kouri nan mache Kwabosal.

Men eske sa ka pase konsa nan administrasyon yon peyi ? Si te gen yon leta tout bon, depi gen konfyolo, lajistis ta dwe mache pran tout moun non yo site, tout moun ki gen arevwa de pre ou de lwen.

Men, se pa konsa sa fèt bò sit. Se jwèt mò rèd! Toutotan zotorite gen pi gwo dosye nan lajistis, toutotan zotorite parèt pi vakabon, se lò sa l ap jwenn gwo djòb : prezidan, konseye, minis, direktè jeneral e latriye.

Si w pa lougawou pa pase nan kafou a minwi boul!

Nicole Théodore

Publicités

About Nouvel Pam

One thought on “Minis Bellevue : Yon ti pwason ki t ap swiv gwo kouran!

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *