Nan atis ki nan biznis, Konpa dirèk dèyè kamyonèt!

Atis Ayisyen yo nan Biznis

Yon tèks Jonel Juste

Miyami, 31 Out— Atis nou yo kòmanse entelijan, y ap fè biznis. Yo fin anraje ap fè pwomosyon pwodui sou rezo soyal yo kote y ap fè yon maketing dirèk dirèk ak fanatik yo. M twouve se yon bon bagay. Antouka m pito moun ap fè biznis sou Facebook pase yo chita ap fè zen tout lajounen oubyen poste foto toutouni.

Atis nou yo kòmanse konprann biznis la se pa chante, danse, fè fim sèlman, men gen aspè biznis la tou. Yo ka sèvi ak imaj yo, ak popilarite yo pou vann sa yo rele pwodui derive yo, sa vle di pwodui ki fèt sou non atis la oubyen imaj li.

Pou kounye a gen omwens 4 atis kap fè bagay sa a rèd chèch: se Izolan ki soti yon pwodui ki rele Izobox, gen Rutschelle (Bouche Shelle Bomb) ak Blondedy (BlondeShelle) ki soti yon fa sou non yo. Chantè Arly Larivière soti yon koleksyon pafen ki rele “IIlusion”. Anjeneral, se atis ameriken nou te konn wè ki fè bagay sa a. Paregzanp yon atis tankou Justin Bieber oubyen Lebron James gen pwodui ki fèt sou non yo ou ki pote imaj yo.

Kim Kardashian gen pafen ak fa ki pote non l. Atis Ayisyen yo te plis konn fè reklam oubyen jwenn kontra ak kèk gwo òganizasyon. Genyen lòt kap fè djòb pòtpawòl gouvènman tankou Tonton Bicha. Men yo potko itilize imaj yo ni non yo pou vann pwodui derive. Bagay la genlè ap chanje e nou swete atis sa yo bòn chans.

Sèl bagay nou pa konnen se reyaksyon piblik Ayisyen an. Eske yap wè s’on bèl bagay? Eske yap ankouraje atis la oubyen eske yap panse se achte figi l (literalman)? Kilè atis konpa yo ap antre pi fon nan biznis?

 

Jonel Juste

 

Publicités

About Nouvel Pam

One thought on “Nan atis ki nan biznis, Konpa dirèk dèyè kamyonèt!

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *