Se Site Solèy ki gen mwens krim nan Pòtoprens koulye a, dapre DG PNH la!

Pòtoprens, madi 6 jen 2017 (nouvelpam.com).- Nan ti koze li tap fè ak kèk jounalis nan Petyonvil, Michel Ange Gédéon, ki se direktè jeneral PNH la fè moun sezi tout bon.

Dapre DG Polis Nasyonal la, Site Solèy ke tout moun te konnen kòm yon zòn kote se tire maten midi swa e se gang ki te konn fè lalwa, chanje tout bon vre. Alèkile, si nou ta rive kwè DG a, ki se yon teknisyen an sekirite ki fè tout karyè li nan lapolis, Site Solèy se zòn kote nan kapital la ki gen mwens moun ki mouri pa bal nan moman sa yo.

Ala sezisman, koulye a, Petyonvil ak Delma sanble pi cho ke tout kote. De tanzantan, se la ki gen kouri, se la ki gen tire, se la ki gen tòdye kou moun ki sot pran ti tcho tcho labank.

DG a pwofite eksplike se abitan Site Solèy ki tèlman bouke ak zafè ensekirite sa, ki fè yo deside kanpe ankwa kont move zak epi yo kolabore san pwoblèm ak fòs polis yo.

DG Gédéon di fòk rezilta sa ta rive tou nan tout lòt zòn nan kapital la. E li mande tout moun pou yo pa gen kè sou biskèt, men lè yo konn yon enfòmasyon ki ka ede kwape bandi, fòk yo pa sere li, men se pou yo pataje l ak lapolis.

Zòrèy pa fèt pou pi long pase tèt!

Publicités

About Nouvel Pam

One thought on “Se Site Solèy ki gen mwens krim nan Pòtoprens koulye a, dapre DG PNH la!

  1. Bonswa SITE SOLÈY!
    Swivan sa mwen li jodi a http://www.nouvelpam.com/2017/06/se-site-soley-ki-gen-mwens-krim-nan-potoprens-koulye-a-dapre-dg-pnh-la/, sikonskripsyonm lan ap viv yon estabilite serye!

    Map felisite DG Michel- Ange GÉDÉON paske li kite sans objektiv yo devlope nan tout sa lap fè. Se pa tout nan moun nan peyi a ki renmen pale sa yo konnen, jès DG PNG la moutrem gen anpil espwa pou lajenès jounen jodi a.

    Map di ak tout moun SITE SOLÈY, mwen kontan nap selebre deklarasyon DG PNH la. Men se pa yon favè. Lapè nan SITE SOLÈY jodi a se rezilta responsabilite ak sansibilizasyon tout PÈP SOLÈY la.
    LAPÈ sa a se fwi travay tout FONDASYON yo, Radio BOUKMAN, LEGLIZ yo, MANBO OUGAN YO, LEKÒL, PROFESYONÈL YO, tout GOUP ÒGANIZE ki nan SITE a ak tout MILITAN POLITIK.

    Mwen menm depite Lemaire PIERRE, reprezantan nou an. Mwen vle nou konprann LAPÈ sa a kòm yon sous kap jayi lanmou nan kè chak grenn Pitit SITE SOLÈYpou rann devlopman dirab nap pale a yon reyalite tout bon vre.

    Mèsi SITE SOLÈY!
    ANSANM NOU KAPAB…
    TRAVAY LA FENK KÒMANSA…

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *